تنبيهات أستاذ مهند ضياء الدين أحد المستلمين بجنة أكتوبر

السلام عليكم .. انا استلمت في عمارة ٢ و هنقل بكرة ان شاء الله .. دي بعض النقط اللي تخلوا بالكم منها اثناء الاستلام و التوضيب او لو هتعدلوا حاجة في التشطيب ..

١. حضرتك مابتعرفش تختبر الكهرباء غير بعد الاستلام لأن مش بتستلم كارت العداد غير بعد محضر الاستلام.

٢. تعاقد الغاز ب ٦٣٥٠ جنيه غير ما تم دفعه في الجهاز (٤١٥٠ غاز و كهرباء) .. و بيركب في ١٥ يوم ولازم تكون الأجهزة موجودة قبل التركيب. ٣. مستوى السباكة سيء عندنا محبس في المنور ضرب بتاع شقة لسة ماسكنتش و كمان كل الوصلات بتاعة الحمامات بتجيب مياه بعد شهر استخدام (أثناء التشطيب) - لازم تضغط المواسير و تكشف عليها. ٤. الناس اللي هتعمل جبسمبورد أو تركب تكيفات الأسقف مش موزونة تماما فالتكيف هيبان مايل. ٥. الأسانسيرات مش كلها اشتغلت في العمارات اللي اتسلمت عشان مفيش عدادات ٣ فاز في شركة الكهربا. ٦. التعاقد على تليفون بيكون في سنترال ٤ في الحي ال١١.. بيتكلف ١٢٠٠ جنيه بالإنترنت عشان كابلات فايبرأوبتكس .. و بيكلموك في خلال ٣ أيام. ٧. للأسف المياه بتقطع بمعدل ٤ ساعات في اليوم فلازم تعمل حسابك او تعمل خزانات .. لأن الموضوع صعب .. لكن قوة دفع المياة كويسة لما تكون شغالة حاليا. ٨. الأمن متواجد ٢٤ ساعة و ناس خدومة الصراحة. ٩. ماتتعاملش مع عرب المنطقة لنقل المخلفات هات حد من بره و لو حد كلمك اتوجه لمهندسين الموقع و يبقى على مسئوليتهم. ١٠. مش مطلوب تصريح دخول لعمال او ما شابه طالما في وجودك او بتكون مبلغ أمن البوابة. ١١. أقرب خدمات ليك عند جولدز جيم .. في صيدلية و سوبر ماركت.. ماجربتش بس اعتقد عندهم ديليفري بيجي عندنا. ١٢. الناس اللي هتسكن و كانت متعودة على بواب بيغسل العربية .. هناك في ناس من الغفر عرضوا علي غسيل العربية بس لسة ماجربتهمش. لو افتكرت حاجة تاني ابقى اكتبلكم ان شاء الله تستلموا على خير 😊